Saturday, September 17, 2016

Oppam review: ഒപ്പം: ലാലും പ്രിയനും വീണ്ടും പ്രേക്ഷകര്‍ക്കൊപ്പം


മുന്നു പതിറ്റാണ്ടോളമായി മലയാളികളെ തീയറ്ററുകളിലേക്ക് ആകര്‍ഷിക്കാനും ആഹഌദിപ്പിക്കാനും പോന്ന മോഹന്‍ലാല്‍-പ്രിയദര്‍ശന്‍ ടീം ഇടയ്ക്ക് കുറച്ചുകാലമായി പ്രേക്ഷകര്‍ക്ക് സമ്മാനിച്ചത് നിരാശയായിരുന്നു. ഒരുപക്ഷേ, 15 കൊല്ലത്തോളം മുമ്പ് കാക്കക്കുയിലില്‍ തുടങ്ങിയ ആ നിരാശകള്‍ അവസാനിപ്പിച്ച് പ്രേക്ഷകരെ വീണ്ടും രസിപ്പിക്കുന്ന ചിത്രവുമായി എത്തുകയാണ് ഇത്തവണ 'ഒപ്പ'ത്തിലൂടെ. രസിപ്പിക്കുക, എന്നാല്‍ പതിവ് പ്രിയന്‍-ലാല്‍ ചിത്രങ്ങളുടെ പ്രധാന ചേരുവയായ നര്‍മമല്ല, ഈ ചിത്രത്തിലെ അടിസ്ഥാനഘടകമെന്നതും ഓര്‍മിപ്പിക്കട്ടെ. ത്രില്ലര്‍ പശ്ചാത്തലത്തില്‍ ഒരുക്കിയിരിക്കുന്ന 'ഒപ്പം' എന്തായാലും പ്രേക്ഷകരെ വെറുപ്പിക്കില്ല, എന്നത് ഗ്യാരന്റി.

അന്ധനായ കഥാപാത്രമായി ആദ്യമായി മോഹന്‍ലാല്‍ എത്തുന്നു എന്നതുതന്നെയാണ് ചിത്രത്തിലെ ആദ്യ പ്രത്യേകത. കുടുംബഭാരം ചുമലിലേറ്റിയ നല്ലവനായ, അധ്വാനിയായ, ഏവര്‍ക്കും പ്രിയങ്കരനായ ക്ലീഷേ കഥാപാത്രമാണ് ജയരാമന്‍ എന്ന ലിഫ്റ്റ് ഓപ്പറേറ്റര്‍. താന്‍ ജോലി ചെയ്യുന്ന ഫഌറ്റിലെ റിട്ട. സുപ്രീം കോടതി ജഡ്ജി കൃഷ്ണമൂര്‍ത്തി (നെടുമുടി വേണു) യുടെ അടുത്ത സഹായി, ഒരുപക്ഷേ, മനസ്സാക്ഷി സൂക്ഷിപ്പുകാരന്‍ കൂടിയാണിയാള്‍. മറ്റാരെയും വിശ്വാസമില്ലാത്ത സഹായങ്ങള്‍ക്ക് മൂര്‍ത്തി കൂടെക്കൂട്ടുക ജയരാമനെയാണ്. ഒരു ആഘോഷരാത്രിയില്‍ മൂര്‍ത്തി കൊല്ലപ്പെടുന്നു. കൊലയാളി തലനാരിഴ വ്യത്യാസത്തില്‍ ജയരാമന്റെ പിടിയില്‍നിന്ന് വഴുതിപ്പോകുന്നു. പോലീസ് ജയരാമനെ സംശയിക്കുന്നു. 

ഇതിനിടെ, കൊലയാളി തന്റൊപ്പം ഉള്ളതായി അന്ധനാണെങ്കിലും മറ്റ് ഇന്ദ്രിയങ്ങളിലൂടെ ജയരാമന്‍ തിരിച്ചറിയുന്നു. ഇക്കാര്യങ്ങള്‍ പോലീസിലുള്‍പ്പെടെ അറിയിക്കുന്നെങ്കിലും അന്ധന്റെ കഥ രക്ഷപ്പെടാനുള്ള കഥയായി മാത്രം കണ്ട് തള്ളുകയാണവര്‍. എന്നാല്‍, കൊലയാളിയില്‍ നിന്ന് രക്ഷനേടുകയെന്നതും അയാളെ പിടികൂടുകയെന്നതും നിരപരാധിത്വം തെളിയിക്കുകയെന്നതും ജയരാമന്റെ മാത്രം ബാധ്യതയാകുന്നു. ഇതാണീ ചിത്രത്തിന്റെ കഥാതന്തു.


കൊലപാതകം കഴിഞ്ഞയുടന്‍ തന്നെ കൊലയാളിയെ (സമുദ്രക്കനി) കാണിക്കുന്നതിനാലും അയാളുടെ ലക്ഷ്യം െവളിപ്പെടുന്നതിനാലും സസ്‌പെന്‍സിനും ട്വിസ്റ്റിനുമുള്ള വകുപ്പൊന്നും ആദ്യമേ കഥയില്‍ ഒളിപ്പിച്ചിട്ടില്ല. അതേസമയം, ഇതൊന്നുമില്ലാതെ ആസ്വാദ്യമായ ത്രില്ലറായി ചിത്രത്തെ പാകപ്പെടുത്തുന്നതിലൂടെയാണ് 'ഒപ്പം' കണ്ടിരിക്കാവുന്ന എന്റര്‍ടെയ്‌നറായി മാറുന്നത്.
ഫഌറ്റില്‍ നടക്കുന്ന കൊല, അപരിചിതന്റെ സ്ഥിരം വരവ് എന്നിവ പ്രേക്ഷകര്‍ക്ക് ഒരു പരിധിവരെയെങ്കിലും ദഹിക്കാതെ പോയാല്‍ കുറ്റം പറയാനാകില്ല. ഒരു സന്ദര്‍ശകന്‍ വന്നാല്‍ െഎ.ഡി പ്രൂഫ്് വരെ വാങ്ങി ഫഌറ്റിനുള്ളിലേക്ക് കടത്തിവിടുകയും മുട്ടിനുമുട്ടിന് സി.സി.ടി.വികളുമുള്ള ഇക്കാലത്ത് അലസമായി ഒരു കൊലയാളി ഫഌറ്റില്‍ നിരവധി തവണ കയറിയിറങ്ങാനാവുന്നത് ഒരു കല്ലുകടിതന്നെയാണ്. ക്‌ളൈമാക്‌സിന്റെ ദൈര്‍ഘ്യവും അല്‍പം വിരസതയുണ്ടാക്കുന്നുണ്ട്. ഇടയ്ക്ക് പോലീസ് സ്‌റ്റേഷനില്‍ നായകന്‍ അതിമാനുഷികനാകുന്നതും കഥയുടെ ഒഴുക്കിനെ പ്രതികൂലമായി ബാധിക്കുന്നുണ്ട്.

ഇവ മാറ്റിവെച്ചാല്‍ അടുത്തിടെ ഇറങ്ങിയ പ്രിയന്‍ ചിത്രങ്ങളുമായി താരതമ്യം ചെയ്താല്‍ സാങ്കേതിക മികവിലും അഭിനേതാക്കളുടെ പ്രകടനങ്ങളിലും സംഗീതത്തിലുമൊക്കെ സ്വര്‍ഗമാണ് 'ഒപ്പം'. ജയരാമന്‍ എന്ന കഥാപാത്രം മോഹന്‍ലാലിന് അനായാസമായി കൈകാര്യം ചെയ്ത് ഫലിപ്പിക്കാനായി. വില്ലനായി സമുദ്രക്കനിയും പോലീസ് ഉദ്യോഗസ്ഥ ഗംഗയായി അനുശ്രീയും കൃഷ്ണമൂര്‍ത്തിയായി നെടുമുടിയും സെക്യൂരിറ്റിയായി മാമുക്കോയയും പോലീസ് ഉദ്യോഗസ്ഥനായി ചെമ്പന്‍ വിനോദും ബാലതാരം മീനാക്ഷിയും തങ്ങളുടെ വേഷങ്ങള്‍ ഭംഗിയാക്കി. 

ബി.കെ ഹരിനാരായണന്‍ രചിച്ച് ഫോര്‍ സംഗീതം പകര്‍ന്ന ഗാനങ്ങള്‍ രസമുള്ളവയാണ്. ഏകാമ്പരത്തിന്റെ ക്യാമറയും ചിത്രത്തിന് നിറം പകരുന്നു. പ്രിയദര്‍ശന്റെ സാങ്കേതിക മികവ് ചോര്‍ന്ന് പോയിട്ടില്ല എന്ന വിളിച്ചറിയിക്കലാണ് ഒരുപരിധി വരെ ഈ ചിത്രം.

1954ലെ 'ദി ഡാര്‍ക്ക് സ്‌റ്റെയര്‍വേ'യുടെ വിദൂരഛായയുണ്ടെങ്കിലും 'ഒപ്പം' ഒരു മോഹന്‍ലാല്‍-പ്രിയദര്‍ശന്‍ ചിത്രമായി ആസ്വദിക്കാന്‍ ഈ ഓണക്കാലത്ത് മലയാളികള്‍ക്ക് പ്രയാസമുണ്ടാകില്ല. കുറച്ചു ജാഗ്രതയും അല്‍പം ഒതുക്കവും ഉണ്ടായിരുന്നെങ്കില്‍ 'ഒപ്പം' കൂടുതല്‍ സുന്ദരമാകുമായിരുന്നു എന്നതും ഇക്കൂട്ടത്തില്‍ പറയേണ്ടതുണ്ട്. 

- അഭിമന്യു 

Oppam, oppam review, mohanlal, priyadarshan, malayalam cinema, malayalam cinema review, latest film news




Friday, September 16, 2016

100 ഗ്രാമങ്ങളില്‍ സിനിമാതീയറ്ററുകള്‍ പരിഗണനയില്‍ -മന്ത്രി എ.കെ. ബാലന്‍


സംസ്ഥാനത്തെ തിരഞ്ഞെടുത്ത 100 ഗ്രാമങ്ങളില്‍ ചെറു സിനിമാ തീയറ്ററുകള്‍ നിര്‍മ്മിക്കുന്ന പദ്ധതി സര്‍ക്കാരിന്റെ പരിഗണനയിലുണ്ടെന്ന് സിനിമാമന്ത്രി എ.കെ. ബാലന്‍ അറിയിച്ചു.

ഇക്കാര്യത്തില്‍ അന്തിമ തീരുമാനം കൈക്കൊണ്ടിട്ടില്ല. തദ്ദേശ സ്ഥാപനങ്ങളുടെ സഹകരണത്തോടെ പൊതു, സ്വകാര്യ പങ്കാളിത്തത്തോടെയാകും പദ്ധതി ആലോചിക്കുക. ചലച്ചിത്ര വികസന കോര്‍പറേഷന്‍ വിചാരിച്ചാല്‍ മാത്രം ഈ പദ്ധതി യാഥാര്‍ഥ്യമാക്കാനാകില്ല. അതുകൊണ്ടാണ് പങ്കാളിത്തം തേടുന്നത്. 100 മുതല്‍ 200 സീറ്റുകള്‍ വരെയുള്ള ചെഹു തീയറ്ററുകളാണ് പരിഗണിക്കുന്നത്. 

തിരുവനന്തപുരത്തെ ചിത്രാഞ്ജലി സ്റ്റുഡിയോയില്‍ ഫിലിം സിറ്റിയും അന്താരാഷ്ട്ര ചലച്ചിത്രോല്‍സവത്തിന് നഗരത്തില്‍ സ്ഥിരം വേദിയും നിര്‍മ്മിക്കുമെന്നും മന്ത്രി വ്യക്തമാക്കി.

new theatres, ak balan, govt of kerala, malayalam cinema

ഓസ്‌കാര്‍ മല്‍സരത്തിനുള്ള പട്ടികയില്‍ 'കാട് പൂക്കുന്ന നേര'വും



ഡോ. ബിജു സംവിധാനം ചെയ്ത 'കാട് പൂക്കുന്ന നേരം'ഓസ്‌കാര്‍ അവാര്‍ഡിനുള്ള ഇന്ത്യയില്‍ നിന്നുള്ള ഔദ്യോഗിക എന്‍ട്രിയാവാനുള്ള മല്‍സരത്തിലുള്ള ഒരേയൊരു മലയാള ചിത്രം. 32 ചിത്രങ്ങളാണ് വിവിധ ഇന്ത്യന്‍ ഭാഷകളില്‍ നിന്ന് അവസാന പട്ടികയില്‍ എത്തിയത്. ഇതിലുള്ള ഏക മലയാള ചിത്രമാണ് 'കാട് പൂക്കുന്ന നേരം'. കേതന്‍ മേത്ത അധ്യക്ഷനായ സമിതി ഈ 32 ചിത്രങ്ങളില്‍നിന്ന് ഇന്ത്യയുടെ ഔദ്യോഗിക ഓസ്‌കാര്‍ എന്‍ട്രി തിരഞ്ഞെടുക്കും. 

ഇന്ദ്രജിത്ത്, റിമാ കല്ലിങ്കല്‍ എന്നിവരാണ് ചിത്രത്തിലെ പ്രധാന താരങ്ങള്‍. ഭൂരിഭാഗം രംഗങ്ങളും കാട്ടില്‍ ചിത്രീകരിച്ച ഈ സിനിമ ഏഷ്യാ ഫെസഫിക് സ്‌ക്രീന്‍ അവാര്‍ഡ് നോമിനേഷനുള്ള ഔദ്യോഗിക മല്‍സരത്തിലേക്കും തിരഞ്ഞെടുക്കപ്പെട്ടിരുന്നു. 

കാനഡയിലെ മോണ്ട്‌റിയല്‍ അന്താരാഷ്ട്ര ചലച്ചിത്രോല്‍സവത്തി്െല ഫോക്കസ് ഓണ്‍ വേള്‍ഡ് സിനിമ വിഭാഗത്തിലും 'കാട് പൂക്കുന്ന നേരം' പ്രദര്‍ശിപ്പിക്കും.

Kaadu pookkunna neram, dr. biju, oscar entry, indian movie, indrajith, malayalam movie, rima kallingal

പൃഥ്വിരാജ് സംവിധായകനാകുന്നു, നായകന്‍ മോഹന്‍ലാല്‍


നടന്‍ പൃഥ്വിരാജ് ആദ്യമായി സംവിധായകനാകുന്ന ചിത്രത്തില്‍ മോഹന്‍ലാല്‍ നായകനാകുന്നു. മുരളി ഗോപി രചന നിര്‍വഹിക്കുന്ന 'ലൂസിഫര്‍' എന്ന ചിത്രത്തിലൂടെയാണ് പൃഥ്വി സംവിധായകന്റെ മേലങ്കി അണിയുന്നത്.

അന്തരിച്ച സംവിധായകന്‍ രാജേഷ് പിള്ള സംവിധാനം ചെയ്യാനിരുന്ന പ്രോജക്ടാണ് 'ലൂസിഫര്‍'. അദ്ദേഹത്തിന്റെ മരണശേഷമാണ് സംവിധായകനായി പൃഥ്വിരാജ് കടന്നുവരുന്നത്. 

ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മിക്കുന്നത്. 

prithviraj, lucifer, mohanlal, murali gopy, rajesh pillai, malayalam movie

Thursday, September 8, 2016

കെ.ജി. ജോര്‍ജിനിത് അര്‍ഹതയ്ക്കുള്ള അംഗീകാരം


മലയാളികള്‍ക്ക് ചലച്ചിത്രസങ്കേതങ്ങളുടെ സാധ്യതകള്‍ പരമാവധി പറഞ്ഞുതന്ന പ്രിയസംവിധായകന്‍ കെ.ജി ജോര്‍ജിന് ലഭിച്ച ജെ.സി. ഡാനിയല്‍ പുരസ്‌കാരം അര്‍ഹതയ്ക്കുള്ള കിരീടം.

മലയാളസിനിമയുള്ളിടത്തോളം കാലം പഠനത്തിനും ചര്‍ച്ചകള്‍ക്കും എല്ലാത്തരം പ്രേക്ഷകര്‍ക്കും അസ്വാദനത്തിനും വക നല്‍കുന്ന വിരുന്നുകളാണ് ജോര്‍ജിന്റെ സിനിമകള്‍. ചെയ്ത ചിത്രങ്ങളുടെയും കൈവെച്ച വിഷയങ്ങളുടെയും വൈവിധ്യവും അവ പറയാനുപയോഗിച്ച സങ്കേതങ്ങളുടെ നൂതനതയും മാത്രം മതി അദ്ദേഹത്തെ മലയാളത്തിന്റെ എക്കാലത്തെയും മികച്ച ടെക്‌നീഷ്യനായി അടയാളപ്പെടുത്താന്‍.

നല്ല സിനിമകളും ഗൗരവമുള്ള പ്രമേയങ്ങളും പറയാന്‍ പ്രത്യേകതരം ശൈലിയോ ചട്ടക്കൂടോ ബലംപിടുത്തങ്ങളോ വേണ്ടെന്ന് പല ഇരുത്തംവന്ന സംവിധാനപ്രതിഭകള്‍ക്കും കാണിച്ചുകൊടുത്തു ജോര്‍ജിന്റെ വഴക്കുമുള്ള കഥപറച്ചിലും അവതരണവും.

നല്ല സിനിമ നല്ല രീതിയില്‍ തീയറ്ററുകളില്‍ കൈയടിവാങ്ങുന്ന രീതിയില്‍ തന്നെ നിലവാരം ചോരാതെ ഒരുക്കുവാനുള്ള ഒരു മാന്ത്രികത അദ്ദേഹത്തിനുണ്ടായിരുന്നു എന്നു പറയുന്നതാകും വാസ്തവം. ഏതൊരു സംവിധായകന്റെയും സ്വപ്‌നമായ കലാമൂല്യവും വാണിജ്യവിജയവും അദ്ദേഹം സ്വന്തം സിനിമകള്‍ നേടിയ തീയറ്റര്‍ വിജയങ്ങളിലൂടെയും നിരൂപകപ്രശംസകളിലൂടെയും നേടിയെടുത്തു.

1975ല്‍ 'സ്വപ്‌നാടനം' എന്ന ആദ്യചിത്രത്തിലൂടെ തന്നെ അദ്ദേഹത്തിന്റെ മികവിന്റെ അടയാളപ്പെടുത്തലായി. മനുഷ്യന്റെ മനോവ്യാപാരങ്ങളിലൂടെയുള്ള ആ യാത്ര നേടിയെടുത്തത് മികച്ച ചിത്രത്തിനും തിരക്കഥയ്ക്കുമുള്ള സംസ്ഥാന അവാര്‍ഡും മികച്ച മലയാള സിനിമയ്ക്കുള്ള ദേശീയ പുരസ്‌കാരവുമായിരുന്നു.

എക്കലത്തെയും മികച്ച ആക്ഷേപ ഹാസ്യ ചിത്രമേതെന്നു ചോദ്യമുയര്‍ന്നാല്‍ ആദ്യമോടിയെത്തുക ജോര്‍ജിന്റെ 'പഞ്ചവടിപ്പാല'മാകും. 

വ്യത്യസ്ത ചലച്ചിത്രവിഭാഗങ്ങളില്‍ മാറിമാറി സഞ്ചരിക്കാനുള്ള മികവ് അടിവരയിടുന്നു അദ്ദേഹം ഒരുക്കിയ സിനിമകളുടെ പട്ടിക. 'യവനിക' പോലൊരു ക്രൈം സസ്‌പെന്‍സ് ത്രില്ലര്‍ ഒരുക്കിയ ആളാണ് 'പഞ്ചവടിപ്പാല'ത്തിന്റെയും സൃഷ്ടാവെന്ന് പറഞ്ഞാല്‍ ജോര്‍ജിനെ അറിയാത്തവരാണെങ്കില്‍ ആദ്യമൊന്ന് അവിശ്വസിക്കും. സ്ത്രീപക്ഷ സിനിമയെന്ന് ലേബല്‍ നല്‍കാവുന്ന 'ആദാമിന്റെ വാരിയെല്ലും', സിനിമയിലെ സിനിമ വിദഗ്ധമായ പറഞ്ഞ 'ലേഖയുടെ മരണം ഒരു ഫഌഷ്ബാക്കും' കാമ്പസ് അനുഭവങ്ങളിലുടെ 'ഉള്‍ക്കടലും' ദാമ്പത്യ അസ്വാര്യസങ്ങളിലൂടെ 'രാപ്പാടിയുടെ ഗാഥ'യും സര്‍ക്കസ് കൂടാരങ്ങള്‍ക്കുള്ളിലെ ജീവിതാനുഭവങ്ങള്‍ തേടിയ 'മേള'യുമൊക്കെ മലയാളസിനിമക്ക് എക്കാലവും ഏതു ഭാഷാ സിനിമകള്‍ക്കു മുന്നില്‍ അന്തസ്സോടെ കാട്ടിക്കൊടുക്കാവുന്ന മാതൃകകളാണ്.

ഭരത് ഗോപിക്കും, രാമചന്ദ്രബാബുവിനൊപ്പം കെ.ജി.ജോര്‍ജ്. ഒരു പഴയകാല ചിത്രം. (കടപ്പാട്: ഭരത്‌ഗോപി.കോം)


മലയാളത്തിലെത്തന്നെ പല നടീനടന്‍മാരെ അവരുടെ പ്രതിഭ പുറത്തെത്തിച്ചത് ജോര്‍ജ് നല്‍കിയ കഥാപാത്രങ്ങളുടെ ശക്തിയായിരുന്നു. 

മമ്മൂട്ടിയുടെ സിനിമാവളര്‍ച്ചയില്‍ 'മേള'യും 'യവനിക'യും വഹിച്ച പങ്ക് മറക്കാനാവുമോ? 'പഞ്ചവടിപ്പാലം' ഗോപിക്കും ശ്രീവിദ്യക്കും നെടുമുടിക്കും 'യവനിക' തിലകനും 'ഉള്‍ക്കടല്‍' വേണു നാഗവള്ളിക്കും സമ്മാനിച്ചത് അഭിനേതാവെന്ന നിലയിലെ വളര്‍ച്ചക്ക്  അവര്‍ക്ക് എക്കാലവും അടയാളപ്പെടുത്താവുന്ന വേഷങ്ങളാണ്. 

'ക്ലാസ്' എന്ന് വിളിപ്പേരുള്ള ചിത്രങ്ങള്‍ മാത്രമെടുക്കുന്ന മികച്ച സംവിധായകരേക്കാള്‍ എല്ലാത്തരം വഴികളിലൂടെയും സഞ്ചരിക്കാന്‍ ആര്‍ജവം കാട്ടി കേരളാവസ്ഥയും മലയാളിയുടെയും ഉള്ളിലെ കടലുകളിലുടെ സ്വപ്‌നാടനം നടത്തിയ കെ.ജി.ജോര്‍ജിന്റെ സംഭാവനകളാകും മഹത്തരമായി വിലയിരുത്താനാകുക. കാലത്തിന്റെ മാറ്റത്തിനനുസരിച്ച് കോലം കെട്ടി സ്വന്തം അസ്തിത്വം കളയേണ്ടെന്ന് തോന്നിയതുകൊണ്ടാകണം, 1998ല്‍ ഓണക്കാലത്തെത്തിയ 'ഇലവങ്കോട് ദേശ'ത്തിനുശേഷം ഒരു ചിത്രവുമായി അദ്ദേഹം നമ്മുടെ മുന്നിലെത്താതിരുന്നത്. 

എന്തായാലും, ജെ.സി. ഡാനിയല്‍ പുരസ്‌കാരം, അല്‍പം വൈകിയാണെങ്കിലും, കെ.ജി. ജോര്‍ജിന് ലഭിക്കുമ്പോള്‍ അതെത്തുന്നത് ഏറ്റവും അര്‍ഹതപ്പെട്ട കരങ്ങളിലാണെന്നതില്‍ ആരും തര്‍ക്കിക്കില്ല.


തയാറാക്കിയത്: അഭിമന്യൂ




k g george, j c daniel award, malayalam cinema, kerala, analysis, malayalam movies

Wednesday, September 7, 2016

കെ.ജി ജോര്‍ജിന് ജെ.സി ഡാനിയേല്‍ പുരസ്‌കാരം


2015ലെ ജെ.സി ഡാനിയേല്‍ പുരസ്‌കാരം തിരക്കഥാകൃത്തും സംവിധായകനുമായ കെ. ജി ജോര്‍ജിന്.  മലയാള സിനിമയ്ക്ക് നല്‍കിയ സമഗ്ര സംഭാവനകള്‍ കണക്കിലെടുത്താണ് പുരസ്‌കാരമെന്ന് സാംസ്‌കാരികമന്ത്രി എ.കെ ബാലന്‍ അറിയിച്ചു. 

ഒരു ലക്ഷം രൂപയും ശില്പവും പ്രശസ്തി പത്രവുമടങ്ങുന്നതാണ് പുരസ്‌കാരം.  ഒക്‌ടോബര്‍ 15 ന് പാലക്കാട് നടക്കുന്ന സംസ്ഥാന ചലച്ചിത്ര അവാര്‍ഡ് നിശയില്‍ മുഖ്യമന്ത്രി പിണറായി വിജയന്‍ പുരസ്‌കാരം കൈമാറും.

1970 കളില്‍ മലയാള സിനിമാ രംഗത്ത് ശ്രദ്ധേയമായ മാറ്റങ്ങള്‍ക്ക് തുടക്കം കുറിച്ച വ്യക്തിയായിരുന്നു കെ ജി ജോര്‍ജ്. മനുഷ്യ മനസ്സിന്റെ അഗാധ തലങ്ങളിലേക്ക് ഇറങ്ങിച്ചെല്ലുന്ന ശാസ്ത്രീയ വിശകലനങ്ങള്‍ തന്റെ കഥാപാത്രങ്ങളിലൂടെ നല്‍കുകയെന്നത് ഇദ്ദേഹത്തിന്റെ സിനിമകളുടെ പ്രത്യേകതയാണ്. 

മികച്ച മലയാളം ഫീച്ചര്‍ ഫിലിമിനുള്ള ദേശീയ അവാര്‍ഡ് ലഭിച്ചിട്ടുണ്ട്. ഒമ്പതു കേരള സംസ്ഥാന അവാര്‍ഡുകളും ലഭിച്ചു. സ്വപ്നാടനം, യവനിക, ആദാമിന്റെ വാരിയെല്ല്, പഞ്ചവടിപ്പാലം, ഇരകള്‍, ഇലവംകോട് ദേശം തുടങ്ങിയവ കെ. ജി. ജോര്‍ജിന്റെ  മികച്ച സിനിമകളാണ്. 

ഐ.വി ശശി ചെയര്‍മാനും സിബി മലയില്‍, ജി.പി വിജയകുമാര്‍, കമല്‍, സാംസ്‌കാരിക വകുപ്പ് സെക്രട്ടറി റാണി ജോര്‍ജ് എന്നിവര്‍ അംഗങ്ങളുമായ ജൂറിയാണ് അവാര്‍ഡ് നിര്‍ണയിച്ചത്.


k g george, j c daniel award, kerala govt award, director k g george, malayalam cinema

 
Cinemajalakam. Design by Wpthemedesigner. Converted To Blogger Template By Anshul Tested by Blogger Templates.