Tuesday, November 16, 2021

26 -ാമത് രാജ്യാന്തര ചലച്ചിത്രമേള ഫെബ്രുവരി 4 മുതല്‍


കേരള സര്‍ക്കാരിന്റെ സാംസ്കാരിക വകുപ്പിനുവേണ്ടി കേരള സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 26 -ാമത്  രാജ്യാന്തര ചലച്ചിത്രമേളയും (IFFK) 13 -ാമത് രാജ്യാന്തര ഡോക്യുമെന്ററി, ഹ്രസ്വചിത്രമേളയും (IDSFFK) തിരുവനന്തപുരത്ത് നടക്കും.

കേരളത്തിന്റെ അഭിമാനമായ രാജ്യാന്തര ചലച്ചിത്രമേളയുടെ 26 -ാമത് എഡിഷന്‍ 2022 ഫെബ്രുവരി 4 മുതല്‍ 11 വരെയാണ് നടക്കുക. മേളയുടെ ഉദ്ഘാടനം നിശാഗന്ധി  ഓഡിറ്റോറിയത്തില്‍ 2022 ഫെബ്രുവരി 4 ന് വൈകീട്ട് 6 മണിക്ക് മുഖ്യമന്ത്രി പിണറായി വിജയന്‍ നിര്‍വഹിക്കും.  കോവിഡ് മഹാമാരിയുടെ പശ്ചാത്തലത്തില്‍പ്പോലും IFFK മുടക്കമില്ലാതെ നടത്താന്‍ നമുക്ക് കഴിഞ്ഞിരുന്നു. തിരുവനന്തപുരത്തെ പന്ത്രണ്ടോളം തിയേറ്ററുകളിലായി എട്ട് ദിവസം നീണ്ടു നില്‍ക്കുന്ന IFFKയുടെ 26 -ാം പതിപ്പ് രാജ്യാന്തര ചലച്ചിത്രമേളയുടെ എല്ലാ പ്രൗഢിയോടെയും നടത്താനാണ് സർക്കാർ ഉദ്ദേശിക്കുന്നത്.

കോവിഡ് വ്യാപനത്തിന്റെ പശ്ചാത്തലത്തില്‍ കഴിഞ്ഞ ജൂലൈ മാസം നടത്താന്‍ കഴിയാതിരുന്ന രാജ്യാന്തര  ഡോക്യുമെന്ററി ഹ്രസ്വചിത്രമേള (IDSFFK) 2021 ഡിസംബര്‍ 9 മുതല്‍ 14 വരെ തിരുവനന്തപുരം ഏരീസ് പ്ളക്സ് എസ് എല്‍  തിയേറ്റര്‍ കോംപ്ളക്സിലെ നാല് സ്ക്രീനുകളില്‍  നടക്കും. മേളയുടെ ഉദ്ഘാടനം മുഖ്യമന്ത്രി പിണറായി വിജയന്‍ ഏരീസ് പ്ളക്സ് എസ്.എല്‍ തിയേറ്ററിലെ ഓഡി 1ല്‍  ഡിസംബര്‍ 9 ന് നിര്‍വഹിക്കും. സര്‍ക്കാര്‍ നിര്‍ദേശങ്ങള്‍ക്കനുസൃതമായി കോവിഡ് മാനദണ്ഡങ്ങള്‍ പാലിച്ചുകൊണ്ടായിരിക്കും മേളകള്‍ സംഘടിപ്പിക്കുകയെന്ന് സാംസ്കാരിക മന്ത്രി സജി ചെറിയാൻ അറിയിച്ചു. 

#iffk #keralaiffk keralafilmfest 

Wednesday, November 3, 2021

തിയേറ്റർ പ്രതിസന്ധി; ഇളവുകളുമായി സർക്കാർ



സിനിമാ ടിക്കറ്റിൻമേലുള്ള വിനോദ നികുതി ഡിസംബർ 31 വരെ ഒഴിവാക്കും

കോവിഡ് ലോക്ക്ഡൗൺ കാരണം അടഞ്ഞു കിടന്നിരുന്ന സിനിമാതിയേറ്ററുകൾ തുറന്നു പ്രവർത്തിക്കുന്നതുമായി ബന്ധപ്പെട്ട് സിനിമാ മേഖല നേരിടുന്ന പ്രശ്നങ്ങളിൽ അനുഭാവപൂർണ നടപടികളുമായി സർക്കാർ. വിവിധ സിനിമാ സംഘടനകൾ ഉന്നയിച്ച വിഷയങ്ങൾ ചർച്ച ചെയ്യാൻ മുഖ്യമന്ത്രിയുടെ അധ്യക്ഷതയിൽ ചേർന്ന മന്ത്രിതല യോഗത്തിലാണ് ഇളവുകൾ നൽകുന്ന കാര്യത്തിൽ തീരുമാനമായത്.
തിയേറ്റർ ഉടമകൾ ഉന്നയിച്ച പ്രധാന ആവശ്യങ്ങളിലൊന്നായ സിനിമാ ടിക്കറ്റിൻമേലുള്ള വിനോദ നികുതി ഒഴിവാക്കി നൽകുവാൻ തീരുമാനമായി. 2021 ഏപ്രിൽ 1 മുതൽ ഡിസംബർ 31 വരെയുള്ള കാലയളവിലേക്കാണ് ഇളവ്. തിയേറ്ററുകൾ അടഞ്ഞു കിടന്ന കാലത്തെ വൈദ്യുതി ഫിക്സഡ് ചാർജിൽ ഇളവുകൾ നൽകും. ഇക്കാലയളവിലെ ഫിക്സഡ് ചാർജിൽ 50% ഇളവ് നൽകും. ബാക്കി തുക 6 തവണകളായി അടക്കുവാനും അവസരം നൽകും. കോവിഡ് കാരണം തിയേറ്ററുകൾ അടഞ്ഞുകിടന്ന കാലയളവിലെ കെട്ടിടനികുതി പൂർണമായും ഒഴിവാക്കി നൽകും. ഇതിനായി ബന്ധപ്പെട്ട തദ്ദേശസ്വയംഭരണ സ്ഥാപനങ്ങളിൽ അപേക്ഷ നൽകണം. ഒരു ഡോസ് വാക്സിനേഷൻ എടുത്തവരെയും തിയേറ്ററുകളിൽ പ്രവേശിപ്പിക്കുവാൻ  തീരുമാനമായി. എന്നാൽ 50 % സീറ്റിങ് കപ്പാസിറ്റി എന്ന നിബന്ധന ആദ്യഘട്ടത്തിൽ തുടരും. ഇക്കാര്യത്തിൽ ഇളവുകൾ അനുവദിക്കുന്ന കാര്യം അടുത്തഘട്ടത്തിൽ ആലോചിച്ചു തീരുമാനം കൈക്കൊള്ളും. ധനകാര്യസ്ഥാപനങ്ങളിൽ തിയേറ്റർ ഉടമകൾക്കും സിനിമാ സംരഭകർക്കുമുള്ള ലോൺ കടബാധ്യതകൾ തിരിച്ചടക്കുവാൻ മൊറട്ടോറിയം വേണമെന്ന ആവശ്യം ചർച്ച ചെയ്യാൻ സംസ്ഥാനതല ബാങ്കിങ് സമിതി യോഗം വിളിച്ചു ചേർക്കുവാനും യോഗം തീരുമാനിച്ചു. സിനിമാ ഷൂട്ടിങ്ങുകൾക്ക് നിലവിലെ പൊതുമാനദണ്ഡങ്ങൾ പാലിക്കണം. സിനിമാ തിയേറ്ററുകൾ തുറക്കുന്നതിനുള്ള പ്രാരംഭ ചെലവുകൾക്കായി തിയേറ്ററുകൾക്ക് പ്രത്യേക ധനസഹായ പാക്കേജ് നൽകുന്ന കാര്യം പരിശോധിച്ച് തീരുമാനമെടുക്കാൻ ധനകാര്യവകുപ്പിനോട് യോഗം ആവശ്യപ്പെട്ടു. സാധാരണ തിയേറ്ററുകളിൽ സ്ക്രീൻ വിഭജിക്കുമ്പോൾ അധിക വൈദ്യുതി താരിഫ് വരുന്നു എന്ന വിഷയം പഠിച്ചു തീരുമാനം അറിയിക്കാൻ വൈദ്യതി വകുപ്പിനെ യോഗം ചുമതലപ്പെടുത്തി.
മുഖ്യമന്ത്രിയുടെ അദ്ധ്യക്ഷതയിൽ ചേർന്ന യോഗത്തിൽ സാംസ്കാരികവകുപ്പ് മന്ത്രി സജി ചെറിയാൻ, ധനകാര്യവകുപ്പ് മന്ത്രി കെ.എൻ ബാലഗോപാൽ, തദ്ദേശസ്വയംഭരണവകുപ്പ് മന്ത്രി എം.വി ഗോവിന്ദൻ മാസ്റ്റർ, ആരോഗ്യവകുപ്പ് മന്ത്രി വീണ ജോർജ്, വൈദ്യുതിവകുപ്പ് മന്ത്രി കെ. കൃഷ്ണൻ കുട്ടി എന്നിവർ  പങ്കെടുത്തു.

Tuesday, October 26, 2021

തീയറ്ററുടമകളുടെ ആവശ്യങ്ങൾ പരിഗണിക്കാൻ മുഖ്യമന്ത്രിയുടെ അധ്യക്ഷതയിൽ മന്ത്രിതല യോഗം ചേരും


 സിനിമാ തീയറ്ററുകൾ തുറക്കുന്നതുമായി ബന്ധപ്പെട്ട് തീയറ്റർ ഉടമകളുടെ ആവശ്യങ്ങൾ പരിഗണിക്കാൻ മുഖ്യമന്ത്രിയുടെ അധ്യക്ഷതയിൽ മന്ത്രിതല യോഗം ചേരും. ധനകാര്യം, തദ്ദേശസ്വയംഭരണം, വൈദ്യുതി, ആരോഗ്യം എന്നീ നാലുവകുപ്പുകളുമായി ബന്ധപ്പെട്ട് മാത്രമേ ഈ വിഷയങ്ങളിൽ തീരുമാനങ്ങൾ എടുക്കാൻ സാധിക്കുകയുള്ളൂ എന്നതിനാലാണ് വകുപ്പ് മന്ത്രിമാരെക്കൂടെ പങ്കെടുപ്പിച്ചു മുഖ്യമന്ത്രിയുടെ സാന്നിധ്യത്തിൽ ഒരു യോഗം ചേരാൻ തീരുമാനിച്ചതെന്ന് സാംസ്‌കാരികമന്ത്രി സജി ചെറിയാൻ അറിയിച്ചു.
കോവിഡ് 19  നിയന്ത്രണങ്ങളുടെ ഭാഗമായി  അടച്ചിട്ടിരുന്ന തിയേറ്ററുകൾ ഈ മാസം 25 മുതൽ തുറക്കുന്നതിന് സംസ്ഥാന ഗവണ്മെന്റ് തീരുമാനിക്കുകയും അതിനായുള്ള നിബന്ധനകളും നിർദ്ദേശങ്ങളും തിയേറ്റർ ഉടമകൾക്ക് നൽകുകയും ചെയ്തിരുന്നു. ഇതിന്റെ പശ്ചാത്തലത്തിൽ, പ്രോട്ടോക്കോളുകൾ പാലിച്ചു കൊണ്ട് തിയേറ്ററുകൾ തുറക്കുന്നതിന്റെ ഭാഗമായി തിയേറ്റർ ഉടമകളുടെ ഭാഗത്ത് നിന്നും ചില അഭ്യർഥനകൾ ഉയർന്നു വരികയും അക്കാര്യങ്ങൾ ചർച്ച ചെയ്യുന്നതിനായി തിയേറ്റർ സംഘടനാഭാരവാഹികളുമായി സാംസ്‌കാരികമന്ത്രി കഴിഞ്ഞ ആഴ്ച ചർച്ച നടത്തിയിരുന്നു. 
 ഈ യോഗത്തിലെ ഉയർന്നുവന്ന അഭ്യർഥനകളും നിർദേശങ്ങളും മന്ത്രി  ചൊവ്വാഴ്ച (ഒക്‌ടോബർ 26)  മുഖ്യമന്ത്രി പിണറായി വിജയനുമായി ചർച്ച നടത്തി. സംഘടനകൾ മുന്നോട്ട് വെച്ച എല്ലാ നിർദേശങ്ങളും സംബന്ധിച്ച് അനുഭാവപൂർണമായ സമീപനമാണ് മുഖ്യമന്ത്രി സ്വീകരിച്ചതെന്ന് സാംസ്‌കാരിക മന്ത്രി അറിയിച്ചു. എത്രയും വേഗം ഈ യോഗം നടത്തി സിനിമാവ്യവസായത്തെയും അതുമായി ബന്ധപ്പെട്ട് പ്രവർത്തിക്കുന്ന എല്ലാവരെയും സഹായിക്കുന്ന സമീപനം സ്വീകരിക്കുവാനാണ് സർക്കാർ ഉദ്ദേശിക്കുന്നതെന്നും ഇതിനാവശ്യമായ തീരുമാനങ്ങൾ മന്ത്രിതലയോഗത്തിൽ ഉണ്ടാകുമെന്നും മന്ത്രി കൂട്ടിച്ചേർത്തു.

cinematheatres, kerala, kerala government, kerala theatres

Tuesday, October 19, 2021

ചലച്ചിത്ര അവാർഡുകൾ പ്രഖ്യാപിച്ചു; ദി ഗ്രേറ്റ് ഇന്ത്യൻ കിച്ചൻ മികച്ച ചിത്രം


സംസ്ഥാന ചലച്ചിത്ര അവാർഡുകൾ പ്രഖ്യാപിച്ചു. സാംസ്‌കാരിക മന്ത്രി സജി ചെറിയാനാണ് വാർത്താസമ്മേളത്തിൽ അവാർഡുകൾ പ്രഖ്യാപിച്ചത്.
മികച്ച ചിത്രം: ദി ഗ്രേറ്റ് ഇന്ത്യൻ കിച്ചൻ, സംവിധായകൻ: ജിയോ ബേബി, നിർമ്മാതാവ്: ജോമോൻ ജേക്കബ്, സജിൻ. എസ്. രാജ്, വിഷ്ണു രാജൻ, ഡിജോ അഗസ്റ്റിൻ.
മികച്ച രണ്ടാമത്തെ ചിത്രം: തിങ്കളാഴ്ച നിശ്ചയം, സംവിധായകൻ: സെന്ന ഹെഗ്‌ഡേ, നിർമ്മാതാവ്: പുഷ്‌കര മല്ലികാർജുനയ്യ.
മികച്ച സംവിധായകൻ: സിദ്ധാർത്ഥ ശിവ, ചിത്രം: എന്നിവർ.
മികച്ച നടൻ: ജയസൂര്യ, ചിത്രം: വെള്ളം: ദി എസൻഷ്യൽ ഡ്രിങ്ക്.
മികച്ച നടി: അന്ന ബെൻ, ചിത്രം: കപ്പേള
മികച്ച സ്വഭാവനടൻ: സുധീഷ്, ചിത്രങ്ങൾ: എന്നിവർ, ഭൂമിയിലെ മനോഹര സ്വകാര്യം.
മികച്ച സ്വഭാവനടി: ശ്രീരേഖ, ചിത്രം: വെയിൽ.
മികച്ച ബാലതാരം (ആൺ): നിരഞ്ജൻ എസ്, ചിത്രം: കാസിമിന്റെ കടൽ.
മികച്ച ബാലതാരം (പെൺ): അരവ്യ ശർമ്മ (ബാർബി), ചിത്രം: പ്യാലി.
മികച്ച കഥാകൃത്ത്: സെന്ന ഹെഗ്‌ഡെ, ചിത്രം: തിങ്കളാഴ്ച നിശ്ചയം.
മികച്ച ഛായഗ്രഹകൻ: ചന്ദ്രു സെൽവരാജ്, ചിത്രം: കയറ്റം.
മികച്ച തിരക്കഥാകൃത്ത്: ജിയോ ബേബി, ചിത്രം: ദി ഗ്രേറ്റ് ഇന്ത്യൻ കിച്ചൻ.
മികച്ച ഗാനരചയിതാവ്: അൻവർ അലി, ഗാനങ്ങൾ: സ്മരണകൾ കാടായ് (ഭൂമിയിലെ മനോഹര സ്വകാര്യം), തീരമേ തീരമേ (മാലിക്).
മികച്ച സംഗീത സംവിധായകൻ (ഗാനങ്ങൾ): എം. ജയചന്ദ്രൻ, ചിത്രം: സൂഫിയും സുജാതയും, ഗാനം: വാതുക്കല് വെള്ളരിപ്രാവ്.
മികച്ച സംഗീത സംവിധായകൻ (പശ്ചാത്തല സംഗീതം): എം. ജയചന്ദ്രൻ, ചിത്രം: സൂഫിയും സുജാതയും.
മികച്ച പിന്നണി ഗായകൻ: ഷഹബാസ് അമൻ, ഗാനങ്ങൾ: സുന്ദരനായവനേ (ഹലാൽ ലവ് സ്റ്റോറി), ആകാശമായവളെ (വെള്ളം).
മികച്ച പിന്നണി ഗായിക: നിത്യ മാമ്മൻ, ചിത്രം: സൂഫിയും സുജാതയും, ഗാനം: വാതുക്കല് വെള്ളരിപ്രാവ്.
മികച്ച ചിത്രസംയോജകൻ: മഹേഷ് നാരായണൻ, ചിത്രം: സീ യു സൂൺ.
മികച്ച കലാസംവിധായകൻ: സന്തോഷ് രാമൻ, ചിത്രങ്ങൾ: പ്യാലി, മാലിക്.
മികച്ച സിങ്ക് സൗണ്ട്: ആദർശ് ജോസഫ് ചെറിയാൻ, ചിത്രം: സന്തോഷത്തിന്റെ രഹസ്യം.
മികച്ച ശബ്ദമിശ്രണം: അജിത് എബ്രഹാം ജോർജ്, ചിത്രം: സൂഫിയും സുജാതയും.
മികച്ച ശബ്ദരൂപകൽപ്പന: ടോണി ബാബു, ചിത്രം: ദി ഗ്രേറ്റ് ഇന്ത്യൻ കിച്ചൻ.
മികച്ച പ്രോസസിംഗ് ലാബ്/ കളറിസ്റ്റ്: ലിജു പ്രഭാകർ, ചിത്രം: കയറ്റം.
മികച്ച മേക്കപ്പ് ആർട്ടിസ്റ്റ്: റഷീദ് അഹമ്മദ്, ചിത്രം: ആർട്ടിക്കിൾ 21.
ജനപ്രീതിയും കലാമേൻമയുമുള്ള മികച്ച ചിത്രത്തിനുള്ള പ്രത്യേക അവാർഡ്: അയ്യപ്പനും കോശിയും, നിർമ്മാതാവ്: ഗോൾഡ് കോയിൻ മോഷൻ പിക്ച്ചർ കമ്പനി, സംവിധായകൻ: സച്ചിദാനന്ദൻ കെ.ആർ.
മികച്ച നവാഗത സംവിധായകൻ: മുഹമ്മദ് മുസ്തഫ ടി.ടി, ചിത്രം: കപ്പേള.
മികച്ച കുട്ടികളുടെ ചിത്രം: ബൊണാമി, നിർമ്മാതാവ്: സിൻസീർ, സംവിധായകൻ: ടോണി സുകുമാർ.
മികച്ച വിഷ്വൽ എഫക്ട്‌സ്: സര്യാസ് മുഹമ്മദ്, ചിത്രം: ലൗ.
മികച്ച വസ്ത്രാലങ്കാരം: ധന്യ ബാലകൃഷ്ണൻ, ചിത്രം: മാലിക്.
മികച്ച ഡബ്ബിങ് ആർട്ടിസ്റ്റ് (ആൺ): ഷോബി തിലകൻ, ചിത്രം: ഭൂമിയിലെ മനോഹര സ്വകാര്യം, കഥാപാത്രം: തമ്പിദുരൈ, തമിഴ്‌നാട് എസ്.ഐ.
മികച്ച ഡബ്ബിങ് ആർട്ടിസ്റ്റ് (പെൺ) : റിയ സൈറ, ചിത്രം: അയ്യപ്പനും കോശിയും, കഥാപാത്രം: കണ്ണമ്മ.
മികച്ച നൃത്തസംവിധാനം: ലളിത സോബി, ബാബു സേവ്യർ, ചിത്രം: സൂഫിയും സുജാതയും.
സ്ത്രീ/ ട്രാൻസ്‌ജെൻഡർ വിഭാഗങ്ങൾക്കുള്ള പ്രത്യേക അവാർഡ്: നാഞ്ചിയമ്മ, ചിത്രം: അയ്യപ്പനും കോശിയും.
പ്രത്യേക ജൂറി അവാർഡ് (അഭിനയം): സിജി പ്രദീപ്, ചിത്രം: ഭാരത പുഴ.
പ്രത്യേക ജൂറി പരാമർശം (വസ്ത്രാലങ്കാരം): നളിനി ജമീല, ചിത്രം: ഭാരത പുഴ.

annaben, jayasurya, kerala, keralafilmaward, thegreatindiankitchen

സിനിമ തീയറ്ററുകൾ ഒക്ടോബർ 25 മുതൽ തുറക്കും

സംസ്ഥാനത്തെ സിനിമ തീയറ്ററുകൾ ഒക്ടോബർ 25 മുതൽ തുറക്കാൻ തീയറ്റർ ഉടമകൾ തീരുമാനിച്ചു. കോവിഡ് പശ്ചാത്തലത്തിൽ അടച്ച്‌ പൂട്ടിയ മൾട്ടിപ്ലെക്‌സുകൾ അടക്കമുള്ള മുഴുവൻ തീയറ്ററുകളും ഈ മാസം 25 ന് തന്നെ തുറക്കുമെന്ന് തീയറ്റർ ഉടമകൾ അറിയിച്ചു. ചൊവ്വാഴ്ച ചേർന്ന തീയറ്റർ ഉടമകളുടെ യോഗമാണ് തീരുമാനം കൈക്കൊണ്ടത്. ഇതിന് മുന്നോടിയായി ഈ മാസം 22 ന് തീയറ്റർ ഉടമകളും സർക്കാരുമായി ചർച്ച നടത്തും.

25 മുതൽ തീയറ്ററുകൾ തുറക്കാൻ  സർക്കാർ നേരത്തെ അനുമതി നൽകിയിരുന്നു.

cinema, kerala, theatres

Wednesday, January 13, 2021

വിനോദ നികുതിയിലടക്കം ഇളവുകൾ; സിനിമാരംഗത്തിന് സർക്കാരിന്റെ കൈത്താങ്ങ്



2021 ജനുവരി മുതൽ മാർച്ച് വരെയുള്ള സിനിമാ തിയറ്ററുകളുടെ വിനോദ നികുതി ഒഴിവാക്കാൻ സംസ്ഥാന സർക്കാർ തീരുമാനിച്ചു. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന യോഗത്തിലാണ് തീരുമാനം.
തിയറ്ററുകൾ അടഞ്ഞുകിടന്ന പത്തുമാസത്തെ വൈദ്യുതി ഫിക്‌സഡ് ചാർജ്ജ് 50 ശതമാനമാക്കി കുറയ്ക്കും. ബാക്കി ഗഡുക്കളായി അടയ്ക്കാൻ അനുവദിക്കും. 2020 മാർച്ച് 31നുള്ളിൽ തിയറ്ററുകൾ തദ്ദേശസ്ഥാപനങ്ങളിൽ ഒടുക്കേണ്ട വസ്തുനികുതി മാസഗഡുക്കളായി അടക്കാം. പ്രൊഷണൽ നികുതിയുടെ കാര്യത്തിൽ തീരുമാനമെടുക്കാൻ സംസ്ഥാന സർക്കാരിന് സാധിക്കില്ല. തദ്ദേശസ്വയംഭരണം, ഇലക്ട്രിക്കൽ ഇൻസ്‌പെക്ടറേറ്റ്, ഫിലിംസ് ഡിവിഷൻ, ബിൽഡിംഗ് ഫിറ്റ്‌നസ്, ആരോഗ്യം, ഫയർഫോഴ്‌സ് എന്നിവയുമായി ബന്ധപ്പെട്ട വിവിധ ലൈസൻസുകളുടെ കാലാവധി മാർച്ച് 31 വരെ ദീർഘിപ്പിക്കാനും തീരുമാനിച്ചു.
വിവിധ ആവശ്യങ്ങളുന്നയിച്ച് കേരള ഫിലിം ചേംബർ ഓഫ് കൊമേഴ്‌സ് ഭാരവാഹികൾ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയിരുന്നു.
തുടർന്ന് മുഖ്യമന്ത്രിയുടെ അധ്യക്ഷതയിൽ വൈദ്യുതി വകുപ്പ് മന്ത്രി എം.എം. മണി, തദ്ദേശസ്വയംഭരണ വകുപ്പ് മന്ത്രി എ.സി. മൊയ്തീൻ, കെ.എസ്.ഇ.ബി ചെയർമാൻ എൻ.എസ്. പിള്ള തുടങ്ങിയവർ പങ്കെടുത്ത യോഗത്തിലാണ് തീരുമാനം.

cinema, covid19, entertainment tax, kerala government
 
Cinemajalakam. Design by Wpthemedesigner. Converted To Blogger Template By Anshul Tested by Blogger Templates.